चार निर्णय सुनाउँदै गृहमन्त्री गुरुङले भने– हरेक फाइल खोलिन्छ अब

काठमाडौँ । गृहमन्त्री गुरुङले अबदेखि देशमा घटेका हरेक अपराध र घटनाका फाइलहरू खोलिने उद्घोष गरेका छन् । गृह मन्त्रालयका तर्फबाट चारवटा महत्त्वपूर्ण र गम्भीर निर्णयहरू सार्वजनिक गर्दै उनले यस्तो बताएका हुन् ।

सम्बोधनका क्रममा गृहमन्त्री गुरुङले नारायणहिटी राजदरबार हत्याकाण्डको थप छानबिन गर्नेदेखि प्रहरीको केन्द्रीय अनुसन्धान ब्युरो (सीआईबी) लाई थप सशक्त बनाउनेसम्मका निर्णयहरू सुनाएका छन् ।

गृहमन्त्रीले सुनाएका ४ महत्त्वपूर्ण निर्णयहरू यसप्रकार छन् ।

१. जेनजी आन्दोलनका मुद्दाः जेनजी आन्दोलनसँग सम्बन्धित घटनामा लगाइएका फौजदारी अभियोजनका मुद्दाहरू फिर्ता गर्न सकिने वा नसकिने सम्बन्धमा छानबिन गरी सिफारिससहितको प्रतिवेदन पेस गर्न विशेष कार्यदल गठन गरिनेछ ।

२. दरबार हत्याकाण्डको थप छानबिनः विसं २०५८ जेठ १९ गते भएको नारायणहिटी राजदरबार हत्याकाण्डका सम्बन्धमा यसअघि भएका अनुसन्धान प्रतिवेदनहरूको अध्ययन गरी थप छानबिनको प्रक्रिया अगाडि बढाइनेछ ।

३. सूचना चुहावट रोक्न एसआईभीटी गठनः गृह मन्त्रालय र सुरक्षा निकायबाट हुने संवेदनशील सूचना चुहावटको घटना हुन नदिन सुक्ष्म निगरानी गरी कारबाही गर्न सुरक्षा निकायमा सेन्सेटिभ इन्फर्मेसन भिजिलियन्स टिम (एसआईभीटी) गठन गरिनेछ ।

४. सीआईबीमा विशिष्टीकृत समूहः नेपाल प्रहरीको केन्द्रीय अनुसन्धान ब्युरो (सीआईबी) लाई थप सशक्त र प्रभावकारी बनाइनेछ । हाल प्रक्रियामा रहेका अनुसन्धानका फाइलहरूलाई शीघ्र टुङ्गोमा पुर्‍याउन निर्देशन दिँदै ब्युरोमा रहेका जघन्य, आर्थिक र सङ्गठित अपराध लगायतका गम्भीर प्रकृतिका मुद्दा अनुसन्धान गर्न प्रकृतिअनुरूपको विशिष्टीकृत समूह गठन गरिनेछ ।