स्याङ्जाबाट अवैध हतियारसहित एकजना पक्राउ

स्याङ्जा ।

स्याङ्जाको भिरकोट नगरपालिका–७ चिउरीखर्क बस्ने ४० वर्षीय यम बहादुर गुरुङलाई आइतबार अवैध एकनाले  भरुवा बन्दुकसहित प्रहरीले पक्राउ गरेको छ ।

गुरुङको साथबाट १ थान फलामको छर्रा ७ वटा, बारुद करिब ५० ग्राम, छर्रा बनाउने सिसा १ थान, सोडा करिब ५० ग्राम, पटाका २ थान र खुकुरी १ थान समेत बरामद प्रहरीले जनाएको छ ।

आफ्नै १७ वर्षीया छोरीलाई घरायसी विवादको विषयलाई लिएर धारिलो हतियार खुकुरी प्रहार गरी घाइते बनाएको भन्ने खबर प्राप्त हुनासाथ प्रहरी चौकी दहथुमबाट खटिएको प्रहरीले खुकुरी खोजी गर्ने क्रममा उक्त अवैध हतियार समेत फेला पारी उनलाई पक्राउ गरेको हो ।

साथै घाइतेलाई उपचारको लागि भिरकोट नगर अस्पताल पठाएकोमा सामान्य उपचार पश्चात थप उपचारको लागि पश्चिम क्षेत्रीय अस्पताल पोखरा लगी उपचार भइरहेको छ । यस सम्बन्धमा प्रहरीले थप अनुसन्धान गरिरहेको छ ।